News News

የህገ ወጥ ንግድ በከፍተኛ ሁኔታ መስፋፋቱ ተገለፀ፡፡

የህገ ወጥ ንግድ በከፍተኛ ሁኔታ መስፋፋት ከወጪ ገቢ ንግድ ሊገኝ የሚችለውን የውጭ ምንዛሬ ከማሳጣቱ ባሻገር አገር በቀል አምራቾች በዓለም ገበያ ተወዳዳሪ እንዳይሆኑ ማድረጉ ተገለፀ፡፡

የኢፌዴሪ የህዝብ ተወካዮች ም/ቤት የንግድና ኢንዱስትሪ ጉዳዮች ቋሚ ኮሚቴ የንግድና ኢንዱስትሪ ሚኒስቴርን የ2011 በጀት የሩብ ዓመት የዕቅድ አፈጻፀም ሪፖርት እና የመቶ ቀናት ዕቅድ ገምግሟል፡፡

በግምገማ ወቅትም ሚኒስቴር መስሪያ ቤቱ በአዲስ መልክ ከተደራጀ በኋላ ዕቅዱን በትኩረት መስክ ማከፋፈሉ የተነሳ ሲሆን ዋና ዋና ተግባራት መካከል የመፈጸምና የማስፈጸም አቅምን ማጎልበት፣ ዘመናዊ፣ ፍትሃዊና በውድድር ላይ የተመሰረተ የንግድ ስርዓት መዘርጋት፣ የአገር በቀል አምራች ኢንዱስትሪዎች ጥራትንና ምርታማነት  ማሳደግ ላይ እንዲሁም ቀልጣፋና የላቀ ገበያ በማስፋፋት የገበያ የትስስር ስርዓት በመገንባት የውጭ ምንዛሬ ለማስገኘት መታቀዱ ለቋሚ ኮሚቴው ተብራርቷል፡፡

የንግድና ኢንዱስትሪ ሚኒስቴር ሚንስትር ወ/ሮ ፈትለውርቅ ገ/እግዚአብሔር መስሪያ ቤቱ በቀጣይ የአገሪቱ ኢንዱስትሪ ዘርፍ የኢኮኖሚውን ድርሻ እንዲወስድ ለማድረግ በሚደረገው እንቅስቃሴ አራት የሚሆኑ የተቀናጀ የአግሮ ኢንዱስትሪ ፓርኮችን በመልማት ሂደት ላይ መሆኑን ጠቅሰው ኢንስቲትዩቶችን በቤተ ሙከራና የዘርፉ አምራቾችን በመደገፍ ረገድ አፈጻጸሙን ደካማ ያደረገውን የሰው ሃይልና የቁሳቁስ እጥረት ለመቅረፍ ከተጠሪ ተቋማት ጋር በጋራ ለመከታተልና ለመደገፍ ታቅዶ እንቅስቃሴ መጀመሩን አስረድተዋል፡፡

ቋሚ ኮሚቴው በበኩሉ መንግስት በከፍኛ ድጎማ የመሰረታዊ ሸቀጥ ወደ ህብረተሰቡ በማቅረብ ህዝቡን ተደራሽ ለማድረግ እየተሰራ ቢገኝም ማርካት እንዳልተቻለና በየጊዜው የሚነሱም ቅሬታዎችም እየተፈቱ አለመሆናቸውን ጠቁሟል፡፡

የሚ/ር መ/ቤቱ አመራሮች በስኳር፣ ዘይትና የስንዴ ምርቶችን ችግር ለመቅረፍ ጥርት መደረጉን ጠቁመው የስኳር እጥረት ችግር ቢፈታም የስንዴ ምርት በአገር ውስጥ በበቂ ሁኔታ አለመመረትና ከውጭ የሚገባውም የጥራት ችግር ያለበት መሆኑን አመልከተው ይሁን እንጂ ችግሩ በቀጣይ እንደሚፈታ ጠቅሰዋል፡፡

ቋሚ ኮሚቴው የማኑፋክቸሪንግ ዘርፍ በዕቅዱ መሰረት አለመፈፀም፣ የህገ ወጥ ንግድ መስፋፋት የውጭ ምንዛሬና የምርት ግብዓት እጥረትን መፈጠሩን ገልጿል፡፡ በአገራችን ቋሚ ኮሚቴው በየጊዜው የነዳጅ ምርት አቅርቦት ዕጥረት በመኖሩ በርካታ ተጠቃሚዎች መጉላላት እየደረሰባቸው እንደሆነና ችግሩን ለመፍታት ሚ/ር መ/ቤቱ በቀጣይ ምን ለመስራት እንዳቀደ የጠየቀ ሲሆን፣ ችግሩ በህገ-ወጥነት ለሶማሌና ለጅቡቲ መሸጡ  ተደርሶበት በጉዳዩ ላይ ከባድርሻ አካላት ጋር እየመከሩ እንደሆነና በሰሜን ወደ ኤርትራ እየተሸጠ ያለውን ነዳጅ ለመቆጣጠር በተደረገው እንቅስቃሴ አሰራር በመቀመጡ አሁን ላይ ችግሩ መቀረፉና በቀጣይም የጠበቀ ቁጥጥር እንደሚደረግ  ምላሽ ተሰጥቷል፡፡

በመጨረሻም ቋሚ ኮሚቴው ባጠቃላይ ቀልጣፋና ቅንጅታዊ የንግድ አሰራር ስርዓት በመዘርጋት አገር በቀል ምርቶችን በዓለም ገበያ ተወዳዳሪ እንዲሆኑ ለማስቻል ብሎም አቅርቦትና ፍላጎትን አጣጥሞ በመሄድ የዘመነ የንግድ ስርዓት ለመዘርጋት ታቅዶ መሰራት እንዳለበት አሳስቧል፡፡