News News

የህዝብ ተወካዮች ምክር ቤት በአስፈጻሚ የመንግስት አካላት ላይ የሚያደርገው የክትልና የቁጥር ተግባር እየተጠናከረ መምጣቱን የተከበሩ አፈ-ጉባኤ አቶ ታገሰ ጫፎ ተናገሩ

የህዝብ ተወካዮች ምክር ቤት በአስፈጻሚ የመንግስት አካላት ላይ የሚያደርገው የክትልና የቁጥር ተግባር እየተጠናከረ መምጣቱን የተከበሩ አፈ-ጉባኤ አቶ ታገሰ ጫፎ ተናገሩ፡፡

የካቲት 29 ቀን 2011 .ም፤ የህዝብ ተወካዮች ምክር ቤት አፈ ጉባኤ የተከበሩ አቶ ታገሰ ጫፎ በምክር ቤቱ የግማሽ ዓመት አፈጻጸምና በቀጣይ 6 ወራት የምክር ቤቱ የስራ አቅጣጫዎ አስመልክተው ጋዜጣዊ መግለጫ ሰጥተዋል፤ከጋዜጠኞች ለተነሱት ጥያቄዎችም ምላሽና ማብራሪያ ሰጥተዋል፡፡

ቀደም ሲል በምክር ቤቱ 20 የቋሚ ኮሚቴዎች አደረጅቶ የክትትልና ቁጥጥር ተግባሩን ሲያከናውን የመጣ ሲሆን፤ በቅርቡ በአስፈፃሚው የመንግስት ተቋማት አደረጃጀት ላይ የተደረገውን ማሻሻያ ተከትሎ በአሁን ወቅት ቋሚ ኮሚቴዎች ቁጥር ወደ 10 ዝቅ እንዲል እና 33 ንዑስ ኮሚቴዎች መደራጀታቸው ተገልጿል፡፡

ባለፉት 6 ወራት ምክር ቤቱ የቀረቡለትን 26 ረቂቅ አዋጆችን መርምሮ ማፅደቁን የተናገሩት አቶ ታገሰ ጫፎ፤ ከነዚህም መካከል የሲቪክ ማህበራት ፣የምግብና መድሃኒት አስተዳደር ቁጥጥር ፣የአስተዳደራዊ ወሰንና የማንነት ጉዳዮች ኮሚሽን፣ የእርቀ ሰላም ኮሚሽንና ሌሎችም ይገኙበታል፡፡

130 የመንግስት ተቋማት እቅዳቸው በሚከታተሏቸው ቋሚ ኮሚቴዎች ተገምግሞ ያቀረቡት እቅድ ደካማ ሆኖ የተለዩ ተቋማት አሻሽለው እንዲያዘጋጁ ተደርጓል፡፡

የኦዲት ግኝትን በተመለከተም ሰፋ ያለ ስራ እንደተሰራ የተገለጸ ሲሆን በዋና ኦዲተር መስሪያ ቤት ሰፋ ያለ ችግር አለባቸው ተብለው በተለዩ ተቋማት ላይ ልዩ ኮሚቴ ተቋቁሞ በጥልቀት መገምገማቸውና በቀጣይም በኦዲት ግኝት መፍትሄ ላይ ከሚመለከታቸው ተቋማት ጋር በአጽንኦት እንደሚሰራ ነው የተጠቆመው፡፡

ከአስፈጻሚ አካላት ጋር በመፈራረም ምን የተለየ ውጤት እንዳመጣ ከጋዜጠኞች ለተነሳላቸው ጥያቄ አፈ-ጉባኤው ሲመልሱ እንዳሉት ምክር ቤቱ ከአስፈጻሚ አካላት ጋር የተፈራረመው የስራ ውል የተቋማትን ተጠያቂነት ለማረጋገጥና ያሉበትን የአፈጻጸም ደረጃም በየጊዜው እያወቁ በመሄድ ጠንካራ አፈጻጸሞችን እንዲያጠናክሩና ድክመታቸውንም ቀርፈው ለተሻለ ውጤት በትጋት እንዲሰሩ ለማመላከት እጅግ ከፍተኛ ጠቀሜታ እንዳለው ነው አፈ ጉባኤ የተከበሩ አቶ ታገሰ ጫፎ የገለፁት፡፡