News News

የኢትዮጵያ ተስማሚነት ምዘና ድርጅት የፍተሻ ላብራቶሪ አቅሙን ማሳደግ እንዳለበት ተገለጸ

የኢትዮጵያ ተስማሚነት ምዘና ድርጅት የፍተሻ ላብራቶሪ አቅሙን ማሳደግ እንዳለበት ተገለጸ፡፡

ጥር 3 ቀን 2011 ዓ.ም የኢፌዴሪ የሕዝብ ተወካዮች ምክር ቤት የንግድና ኢንዱስትሪ ጉዳዮች ቋሚ ኮሚቴ የኢትዮጵያ ተስማሚነት ምዘና ድርጅት የ2011 በጀት አመት የሁለተኛ ሩብ አመት የዕቅድ አፈጻጸም ሪፖርት ገምግሟል፡፡

የኢትዮጵያ ተስማሚነት ምዘና ድርጅት ዋና ዳይሬክተር አቶ ተሻለ በልሁ ድርጅቱ በኢንስፔክሽን፣ሰርተፊኬሽን እና በፍተሻ ላብራቶሪ ስራዎች ላይ ትኩረት አድርጎ እንደሚሰራ ገልጸው፤ ለድርጅቱ ሰራተኞች የአቅም ማጎልበቻ ስልጠናዎች መስጠታቸውን፣የተለያዩ የግንዛቤ ማስጨበጫ ፕሮግራሞች መካሄዳቸውን፣ የአገልግሎት አሰጣጥ ላይ የሚቀርቡ ቅሬታዎችን ፈጣን ምላሽ ከመስጠት አኳያ የተሻለ ስራ መስራታቸውን ጠቁመዋል፡፡

 የፍተሻ አገለግሎትን በሚመለከት ተአማኒነት ያለው 9281 የፍተሻ አገልግሎት ለመስጠት ታቅዶ 7440 የፍተሻ አገልግሎት መስጠታቸውን ፣5229 የኢንፔክሽን  አገልግሎት ለመስጠት ታቅዶ 3050  አገልግሎት መስጠት መቻሉን እና 827 የሰርተፊኬሽን አገልግሎት ለመስጠት ታቅዶ 446 አገለግሎት መሰጠቱን አብራርተዋል፡፡በተጨማሪም የገቢ ምንጮችን የማስፋትና ገቢን የማሳደግ፣ የጥራትና ቁጥጥር ስራዎች ተደራሽነትና ተወዳዳሪነት የማሳደግ ስራዎች እያከናወኑ መሆኑን ገልጸዋል፡፡

በስራ ሂደት ያጋጠሙዋቸውን ችግሮች በሚመለከት በመሣሪያ ብልሽት ምክንያት የማይፈተሹ ባህሪያትን ከሚመለከታቸው ጋር በመነጋገር አውትሶርስ ማድረጋቸውንና ለደንበኞቹም እንዲያውቁት መደረጉን የግንባታዎቹ መጓተት መንስዔዎች ከኮንትራከተሮችና ከአማከሪው ጋር በመሆን በመገምገም የግንባታው ጊዜ ለተወሰነ ወራት ተራዝሞ ስራዎቹ እንዲቀጥሉ  መደረጉን እና የድርጅቱን የሰው ሃይል የተሟላ ለማድረግ 40 ባለሙያዎች ለመቅጠር የተያዘው እቅድ መዋቅሩ ባለመለቀቁ አለመከናወኑን ነገርግን በኮንትራት 5 ሰራተኞች መቅጠራቸውን ሪፖርቱን ባቀረቡበት ወቅት ተናግረዋል፡፡

ቋሚ ኮሚቴው በበኩሉ ሪፖርቱን አስመልክቶ በሰጠው አስተያየት ፈጻሚውን የማዘጋጀትና የተሻለ ስራ የሰሩትን የመሸለምና ለማበረታታት የተከናወኑ ተግባረት፣በሰርተፊኬሽን፣በኢንስፔክሽንና ላብራቶሪ የተሰሩ ስራዎች እንዲሁም የኦዲት ስራው፣ ገቢን የማሳደግና ወደ 48 ሚሊየን  ብር መሰብሰብ መቻሉ ፣ አዳዲስ ደንበኞችን የማፍራት ስራውእና ድርጅቱ ከጊዜ ወደ ጊዜ የተሻለ ስራ እየሰራ መሆኑን በጥሩ ጎን አንስቷል፡፡

በሌላ በኩል ሰርቲፋይ የሚያደርጋቸውን ተቋማት በሚዲያ የማሳወቅ ስራ ፣የኪራይ ሰብሳቢነት አመለካከትን የመቅረፍ፣የላብራቶሪ አገልግሎት አሰጣጥንና የላብራቶሪ አቅም ማሳደግ፣ኢንዱስትሪ ፓርኮች ላይ የአንድ ማዕከል አገለግሎት መስጠት እና የሴቶችን ተሳተፎ ማሳደግ፣የተጀመሩ ግንባታዎችን በወቅቱ ማጠናቀቅ፣ታቅደው ያልተከናወኑ ተግባራት እንዲሁም ከንግድና ኢንዱስትሪ ጋር በጋራ በመስራት ያሉ ችገሮችን መፍታት ትኩረት ሊሰጠው  እንደሚገባ አሳስቧል፡፡

 ከቋሚ ኮሚቴው ለተነሱ ጥያቄዎችና አስተያየቶች ዋና ዳይሬክተሩና ሌሎች የስራ ሃላፊዎች መልስ የሰጡ ሲሆን በቀጣይ ወራት ታቅደው ያልተከናወኑ ተግባራትን ለማከናን  ትኩረት ሰጥተው እንደሚሰሩ ገልጸዋል፡፡