News News

የተቋማትን ተጠያቂነት ለማረጋገጥ ምክር ቤቱ ከዴሞክራሲ ተቋማት ጋር የፊርማ ስነ ስርዓት አካሄደ፡፡

የተቋማትን ተጠያቂነት ለማረጋገጥ ምክር ቤቱ  ከዴሞክራሲ ተቋማት ጋር  የፊርማ ስነ ስርዓት  አካሄደ፡፡

በፊርማ  ስነ ስርዓቱ ላይ የዲሞክራሲ ተቋማት ከህግ፣ ፍትህና ዲሞክራሲ ጉዳዮች ቋሚ ኮሚቴ፤ የፌዴራል ዋና ኦዲተር መ/ቤት ደግሞ ከመንግስት ወጪ፣ አስተዳደርና ቁጥጥር ግዳዮች ቋሚ ኮሚቴ ጋር ተፈራርመዋል፡፡

የፌዴራል ጠቅላይ ፍ/ቤት ፣ የሰብዓዊ መብት ኮሚሽን ፣ የህዝብ እንባ ጠባቂ ፣ የፌዴራል ስነ ምግባርና ፀረ ሙስና ኮሚሽን፣ የኢትዮጵያ ብሮድካስት ኮርፖሬሽን ፣ የኢትዮጵያ ብሮድካስቲንግ ባለስልጣን፣ የኢትዮጵያ ፕሬስ ድርጅት እና የኢትዮጵያ ዜና አገልግሎት የስራ ኃለፊዎች ከምክር ቤቱ  ከየህግ፣ ፍትህና ዲሞክራሲ ጉዳዮች ቋሚ ኮሚቴ ሰብሳቢ ወ/ሮ ፎዚያ አሚን ጋር ተፈራርሟል፡፡ በተመሳሳይም የመንግስት ወጪ፣ አስተዳደርና ቁጥጥር ጉዳዮች ቋሚ ኮሚቴ ሰብሳቢ  የሆኑት አቶ መሐመድ ዩሱፍ ከፌዴራል ዋና ኦዲተር አቶ ገመቹ ዲቢሶ ጋርም  ተፈራርመዋል፡፡

የምክር ቤት አፈ-ጉባዔ አቶ ታገሰ ጫፎ በፊርማው ስነ ስርዓት  ወቅት ንግግር ያደረጉ ሲሆን፤  የፊርማ ስነ ስርዓቱ ዓላማ የዲሞክራሲ ተቋማት ለዜጎች ፍትህን ለማረጋገጥ፤ አስተዳደራዊ በደልን ለማረምና ለመከላከል ፣ የመንግስት በጀትና ሃብት በአግባቡ ስራ ላይ ውሎ የዜጎች ተጠቃሚነት እንዲረጋገጥ ለማስቻል እንዲሁም የዜጎች ሰብዓዊና ዲሞክሲያዊ መብቶች እንዲጠበቁ፤ እና  በስነ ምግባር የታነፀ ሙስናን የሚጸየፍ ዜጋን ለማፍራት በሚደረገው ጥረት የክትትልና የቁጥጥር ስርዓቱን ለማጠናከር ነው ብለዋል፡፡

አፈ ጉባኤው አክለውም የዜጎችን መምረጥና የመመረጥ መብትን ለማስጠበቅ፤ የመድብለ ፓርቲ ስርዓትን ለማጠናከር አይነተኛ ድርሻ እንዳለው ገልፀዋል፡፡

የምክር ቤቱ የህግ፣ ፍትህና ዲሞክራሲ ጉዳዮች ቋሚ ኮሚቴ ሰብሳቢ ወ/ሮ ፎዚያ አሚን በበኩላቸው ተጠሪ ተቋማቱ ከቋሚ ኮሚቴዎች ጋር የስራ ውል መፈራረማቸው የምክር ቤቱን  የክትትልና ቁጥጥር ስርዓትን ለማሳደግ ያለው ፋይዳ የጎላ  መሆኑን አንስተው፤ተጠሪ ተቋማቱ ውል በገቡት መሰረት የተሰጣቸውን ሃላፊነት  በትጋት እንዲወጡ አሳስበዋል፡፡

ከዚህ በፊትም ሌሎች ቋሚ ኮሚቴዎች ከሚከታተሏቸው ከተለያዩ አስፈጻሚ ተቋማት ጋር የስራ ውል ስምምነት ፊርማ መፈፀማቸው   ይታወሳል፡፡