News News

በቱሪዝም ኢትዮጵያ የሚስተዋሉ ብልሹ አሰራሮች በአስቸኳይ መቀረፍ እንዳለባቸው በህዝብ ተወካዮች ምክር ቤት የሴቶች፣ወጣቶችና ማህበራዊ ጉዳዮች ቋሚ ኮሚቴ አስታወቀ፡፡

በቱሪዝም ኢትዮጵያ የሚስተዋሉ ብልሹ አሰራሮች በአስቸኳይ መቀረፍ እንዳለባቸው በህዝብ ተወካዮች ምክር ቤት የሴቶች፣ ወጣቶችና ማህበራዊ ጉዳዮች ቋሚ ኮሚቴ አስታወቀ፡፡

ቋሚ ኮሚቴው ህዳር 24 ቀን 2011 ዓ/ም የቱሪዝም ኢትዮጵያን ቀጣይ የመቶ ቀን እቅድ እና የ2011 በጀት ዓመት  የ1ኛ ሩብ ዓመት እቅድ አፈጻጸም ሪፖርት አዳምጧል፡፡

በቱሪዝም ኢትዮጵያ የማርኬቲንግ ዳይሬክተር የሆኑት አቶ ወልደገብርኤል በርሄ የተቋሙን የመቶ ቀን እቅድ ባቀረቡበት ወቅት የውጭ ምንዛሬን ለማሳደግ፣ የቱሪዝም ፈንድ ለማቋቋም፣ እንዲሁም በዘርፉ በአለም ላይ ተወዳዳሪ ለመሆን የሚያስችል የገቢያ ስርዓት ለመፍጠር እና የቱሪዝም መዳረሻ ቦታዎችን ለማልማት እንደታሰበ አብራርተዋል፡፡

የተቋሙን ራዕይና ተልዕኮ በአዲስ መልክ ለመቅረጽ እንደታሰበ የገለጹት አቶ ወልደገብርኤል፣ የቱሪዝም መዳረሻ ቦታዎችን በቀላሉ ለጎብኝዎች ለማስተዋወቅ በሳይንስ የተደገፈ የቱሪዝም ሳተላይት አካውንት ለመዘርጋት ዝግጅት እየተደረገ እንደሆነም ተናግረዋል፡፡

በሌላ በኩል የ2011 በጀት ዓመት የ1ኛ ሩብ ዓመት እቅድ አፈጻጸም ሪፖርት ቀርቦ ውይይት የተካሄደበት ሲሆን የተሰሩ ስራዎች ውጤት የማያሳዩ፣ ሊመዘኑና ሊለኩ የማይችሉ መሆናቸውን ቋሚ ኮሚቴው በጥልቀት ገምግሟል፡፡

የተቋሙ የመቶ ቀን እቅድ እና የሩብ አመት አፈጻፀም ሪፖርት እንደማይጣጣሙ የገለጹት የቋሚ ኮሚቴው አባላት ከባለፉት አመታት ጀምሮ በተቋሙ ስር የሰደዱ የኪራይ ሰብሳቢነት አመለካከትና ተግባር፣ እንደሁም የመልካም አስተዳደር ችግሮችን በዘላቂነት ለመፍታት በ2011 በጀት ዓመት እቅድ ላይ አለመካተታቸው ታላላቅ ክፍተቶች መሆናቸውን አስረድተዋል፡፡

በተመሳሳይም ተቋሙ ያሉበትን ዘርፈ-ብዙ ችግሮች በዝርዝር ለይቶ ለመቅረፍ የሚያስችል ቁመና የሌለው እና ቦርዱ ያላጸደቀው እቅድ ለኛ መቅረቡ ተቀባይነት የለውም፤ እቅዱ እንደገና  መታየትና መከለስ አለበት ሲሉ የቋሚ ኮሚቴው አባላት ተናግረዋል፡፡

የቋሚ ኮሚቴው ሰብሳቢ የተከበሩ ወ/ሮ አበባ ዮሴፍ በበኩላቸው የቀረበው እቅድ በተቋሙ የሚታዩትን ውስብስብ ችግሮች ስርነቀል በሆነ መንገድ ለመፍታት የተሟላ እንዳልሆነ እና የሩብ አመት ሪፖርቱም ውጤትን ሳይሆን ሂደትን የሚያሳይ መሆኑን ገልጸው፣ በቀጣይ GTPውን መሰረት አድርጎ ሊመዘን የሚችል እቅድና ሪፖርት በአጭር ጊዜ ውስጥ መቅረብ እንዳለበት አሳስበዋል፡፡

የቱሪዝም ኢትዮጵያ ተወካይ ዋና ዳይሬክተር የሆኑት ወ/ሮ ሌንሳ መኮንን በበኩላቸው በቀጣይ እቅዱን አስተካክለው እንደሚመጡ ገለጸው ባለፉት ወራቶች ከእቅድ ይልቅ የተቋሙን አደረጃጀት ለማስተካከል ትኩረት የተሰጠ መሆኑን ተናግረዋል፡፡

አያይዘውም በተቋሙ ጎልተው ለሚስተዋሉ ችግሮች መንስኤ የሆኑት የአመራር ክፍተቶች፣ የተቋሙ የቦርድ ተጠሪነት ግልጽ አለመሆን እና የሰራተኞች የአቅም ውስንነቶች በመኖራቸው ነው ሲሉ አክለዋል፡፡