Participate Participate

ስለ ኮሙኒኬሽን አገልግሎት የወጣ አዋጅ

Threads [ Previous | Next ]
መንግስት በቅርቡ ባወጣው የፖሊሲ አቅጣጫ መሠረት የመንግስት የልማት ድርጅቶችን አሰራርና አፈጻጸም ማሻሻልና ማዘመን እንዲሁም በከፊል ወይም ሙሉ በሙሉ በፕራይቬታይዜሽን የግሉን ባለሀብት ለማሳተፍ ማቀዱ ይታወሳል፡፡በፖሊሲው አቅጣጫ መሠረት መንግሥት ያለውን የአክሲዮን ድርሻ ከግማሽ ያላነሰውን ይዞ ቀሪውን የአክሲዮን ድርሻ ለግል ባለሀብት ለማስተላለፍ አቅጣጫ ካስቀመጠባቸው ዘርፎች ውስጥ አንዱ የቴሌኮሙኒኬሽን አገልግሎት መሆኑ ይታወቃል፡፡የፖሊሲ አቅጣጫው በተጨማሪም መንግሥት በመጀመሪያ ደረጃ ደረጃውን የጠበቀ የቴሌኮም ሬጉላቶሪ ማዕቀፍ በማዘጋጀት በሥራ ላይ ካዋለ በኋላ በቀጣይ የግል የቴሌኮም ኦፕሬተሮች ራሳቸውን ችለው በዘርፉ ኢንቨስት ለማድረግ የሚችሉበትን ሁኔታ አመላክቷል፡፡
 
የመንግስት የልማት ድርጅቶችን በከፊል ወይም ሙሉ በሙሉ ወደ ግል ይዞታነት የማዛወር የፖሊሲ ውሳኔ የኢኮኖሚ ዕድገቱን ማስቀጠልና የኢኮኖሚ ትራንስፎርሜሽኑን ማፋጠን፣ የልማት ፋይናንስ አቅርቦትን ማሳደግ፣ የግሉ ዘርፍን ልማትና ተሳትፎ ማሳደግ፣ የመንግስት የልማት ድርጅቶችን ተወዳዳሪነትና ምርታማነት ማሳደግ እና የመንግስት የልማት ድርጅቶችን የኮርፖሬት ፋይናንስ አቅም ማጠናከር ዓላማዎች ያለው ሲሆን የኢኮኖሚ ፖሊሲ ማሻሻያውን በተሳካ ሁኔታ በመተግበር የተጠቀሱትን ዓላማዎች ከግብ ለማድረስ፣ እንዲሁም ሂደቱን በግልጽነት ለመምራት ከሚረዱ መርሆዎች ውስጥ አንዱ በተሟላ የፖሊሲና የሬጉላቶሪ ማዕቀፍ መመራት እና ውድድርን ማስፈን ነው፡፡ ይህንንም ተግባራዊ ለማድረግ የተሟላ የውድድር መድረክ ለመፍጠር የሚያስችል የፖሊሲና የሬጉላቶሪ ማዕቀፍ፣ እንዲሁም አስቻይ የሆነ የተቆጣጣሪ አካል አደረጃጀት በመቅረጽ በሥራ ላይ ማዋል ይጠበቃል፡፡
 
በመሆኑም የቴሌኮሙኒኬሽን ዘርፉን ሪፎርም በተሻለ ሁኔታ ለመምራትና ለማሳካት ጠንካራ የፖሊሲና ሬጉላቶሪ ማዕቀፍ መዘርጋትና ማዕቀፉን መሠረት በማድረግ የተሟላ ቁጥጥር የሚያደርግ ብቃት ያለው ተቋም በማደራጀት የህዝብን ጥቅም ማስከበር ተገቢ ይሆናል፡፡
 
በተጨማሪም የኮሙኒኬሽን ወይም የቴሌኮሙኒኬሽንና የፖስታ አገልግሎት ለአገራችን የኢኮኖሚ ልማትና ዕድገት በሁሉም ዘርፍ ለሚደረጉ ልማታዊ እንቅስቃሴዎች ካለው የአንቀሳቃሽነት ፋይዳ በተጨማሪ እንደ አንድ የኢኮኖሚ ዘርፍ የወቅቱን የኢንዱስትሪ ዕድገት ተከትሎ ተገቢውን ድርሻ እንዲያበረክት የሚያስችለው የሕግና የሬጉላቶሪ ማዕቀፍ ሊኖረውና ሊመራበትም ይገባል፡፡
 
በዚህም መሠረት በቴሌኮሙኒኬሽን ዘርፍ የተቀመጠውን የሪፎርም አቅጣጫ ከግብ ለማድረስ እና የቴሌኮሙኒኬሽን እና የፖስታ አገልግሎት የሬጉሌሽን ስርዓት ለመዘርጋት እንዲሁም በተሻለ እና በተጠናከረ ሁኔታ ለመምራት የኮሙኒኬሽን አገልግሎት ሬጉሌሽን አዋጅ ማዘጋጀት አስፈላጊ ሆኖ የተገኘ ሲሆን የባለድርሻ አካላትን በማሳተፍ እና በአዋጁ ረቂቅ ላይ ተከታታይ ውይይት በማድረግ፣ በተገኙ ግብዓቶች በማዳበር እና በማሻሻል የአዋጁ ረቂቅ ተዘጋጅቶ ቀርቧል፡፡
0 (0 Votes)

Quick Reply